O BNG de Vigo propoñerá duplicar o recargo do imposto sobre bens inmobles (IBI) para as vivendas que permanezan desocupadas durante máis de tres anos e elevalo ata un 150 % para os grandes propietarios que teñan dous ou máis pisos baleiros. Nun comunicado, o Bloque anunciou que trasladará esta medida ás ordenanzas fiscais municipais para 2027, xunto cunha bonificación do 95 % para as vivendas que se incorporen a programas públicos de alugueiro ou se destinen a alugueiro protexido ou social.
O voceiro nacionalista, Xabier Pérez Igrexas, cualificou de “absurdo” que na cidade existan máis de 22.000 vivendas baleiras mentres preto de 12.000 persoas están inscritas no rexistro de demandantes de vivenda protexida. “Temos un inmenso parque de vivenda baleira nunha cidade onde cada vez máis traballadores e mozos non se poden permitir, literalmente, o luxo de ter unha vivenda”, criticou. Neste sentido, o BNG reclama combinar medidas de penalización dos pisos baleiros con incentivos para favorecer a súa incorporación ao mercado de alugueiro social e protexido.
