Preto dun centenar de empregados do comercio, convocados por Comisións Obreiras, protestou na mañá deste martes en Vigo en contra de traballar os domingos e festivos: “Esiximos tempo para vivir”.

Ás portas do Corte Inglés da cidade olívica, situado na rúa Gran Vía, delegados sindicais e traballadores fóra de quenda reuníronse para acabar co “abuso colectivo” de abrir varios domingos e festivos ao ano.

A berros de ‘Festivos pechados, dereitos respectados’; ‘Traballar sen parar non nos deixa conciliar’, ou ‘En festivo non se vende. O descanso deféndese’, os traballadores lamentaron a decisión da Xunta de autorizar varias aperturas en domingos e festivos este verán sen consultar cos sindicatos.

Respecto diso, o secretario xeral da Federación de Servizos de Comisións Obreiras Galicia, Iván Cordeiro, explicou que esta protesta é a antesala da folga convocada para o vindeiro sábado, día 15 de agosto, por varios sindicatos ante a autorización de abrir ese festivo.

Cordeiro indicou que non se levou a cabo ningún cambio de normativa, asegurando que a lei permite abrir ata 10 domingos e festivos ao ano en Galicia. Con todo, normalmente a autorización para facelo vén precedida por unha consulta aos sindicatos, que nesta ocasión non se produciu.

“Escolléronse dous festivos moi sinalados en Galicia, como foi o día seguinte a Santiago Apóstolo e San Roque, cando os traballadores poderían ter un fin de semana longo de calidade para gozar coas súas familias”, lamentou.