Un motorista de 60 anos, identificado coas iniciais P.G.I., resultou ferido moi grave na tarde deste martes tras chocar contra outro vehículo na parroquia viguesa de Valladares. Segundo fontes do 112 Galicia, o accidente produciuse minutos antes das 14.00 horas, á altura do punto quilométrico 3,5 da PO-330. No sinistro víronse implicados unha motocicleta e un vehículo tipo “pick-up”, que tería impactado contra a moto.
DÚAS AMBULANCIAS ATENDERON O FERIDO NA ESTRADA
Ata o lugar desprazáronse efectivos de Urxencias Sanitarias de Galicia-061, da Policía Local, da Garda Civil de Tráfico e dos bombeiros. A persoa ferida estaba liberada e accesible, polo que non foi necesario realizar tarefas de desencarceramento. Fontes presenciais indicaron que ata dúas ambulancias tiveron que atender o motorista na propia estrada e que o home presentaba unha importante perda de sangue.
TRASLADADO AO ÁLVARO CUNQUEIRO EN UVI MÓBIL
Finalmente, unha UVI móbil con base en Mos trasladou o ferido ao Hospital Álvaro Cunqueiro, segundo confirmou o 061. O seu estado era moi grave tras o impacto.
