O concello de Vigo situouse no mes de decembro, “de novo”, á cabeza das administracións de España pola súa prema no pago a provedores, cunha media de 7,4 días de demora, é dicir, que paga “de forma inmediata”.
Así o trasladou en rolda de prensa o alcalde da cidade olívica, Abel Caballero, quen explicou que, segundo os datos que se fixeron públicos, o Concello volveu a estar á cabeza no pago aos provedores, coa mellor media “de toda España”.
O rexedor comparou esa media coa demora doutras administracións municipais, como os concellos da Coruña (54 días), Santiago (81 días), Ourense (112 días), Pontevedra (33 días), Málaga (23 días) ou Sevilla (49 días). Así mesmo, recalcou que o período medio de pago da Xunta é de 15 días, “e Vigo paga na metade de tempo”.
Abel Caballero, quen recordou que, no pasado ano, o Concello olívico pagou a provedores case 147 millóns de euros a través de 13.300 facturas, explicou que o período de pago de Vigo foise reducindo paulatinamente, pasando dos 12,2 días de outubro aos 7,4 do mes de decembro. “Síntome moi orgulloso deste logro, é unha forma de estimular a economía e o emprego”, proclamou.
