Traballadores de Iberconsa, empresa dedicada á elaboración de produtos do mar conxelados, concentráronse este xoves ante a planta dunha das compañías do grupo, Frigalsa, no barrio vigués de Teis, para reclamar melloras laborais. Esta protesta enmárcase no calendario de mobilizacións iniciado a principios de xuño, cunha concentración ante a sede de Iberconsa no peirao de Bouzas.

Segundo informou a CIG, o persoal reclama unha terceira paga extra, unha subida salarial de 40 euros mensuais para a categoría 2 e a extensión da prima de penosidade a todo o persoal que accede á cámara frigorífica. Tamén piden o abono íntegro do plus de serras e que as gratificacións voluntarias deixen de ser absorbibles. “En definitiva, o que propoñemos son unha serie de posibilidades que permitan incrementar os baixos salarios que fixa o convenio estatal do sector”, apuntaron desde a CIG.