O BNG de Vigo esixiu ao goberno local de Abel Caballero que “deixe de boicotear” eventos organizados polo tecido asociativo da cidade, denunciando “obstáculos e enormes demoras” na tramitación de permisos e reclamando máis persoal municipal e apoio económico para as actividades dos colectivos veciñais.
Nun comunicado, o Bloque criticou que a “incapacidade na xestión” da Concellaría de Seguridade, dirixida pola edil imputada Patricia Rodríguez, está a converterse nunha “sabotaxe institucional” que engade dificultades á organización de iniciativas culturais e sociais promovidas por asociacións e colectivos sen ánimo de lucro.
O portavoz nacionalista local, Xabier Pérez Igrexas, lamentou que entidades que pon “recursos e traballo” para facer posibles actividades abertas aos veciños se atopen cunha administración que, en lugar de axudar e facilitar, “converte a tramitación de permisos nunha yincana insoportable”.
“Non ten explicación que sistematicamente se estean resolvendo os permisos a escasas horas do inicio dos eventos ou que se notifiquen novos requirimentos sen tempo material”, afirmou Igrexas, que puxo como exemplo as recentes fogueiras de San Juan e outras actividades culturais.
