As primeiras hipóteses sobre o cadáver achado o sábado no alto de Monteferro, en Panxón (Nigrán, Pontevedra), apuntan a que se trata dun home desaparecido hai meses, segundo indicaron fontes próximas á investigación. Non obstante, será a autopsia do corpo a que confirme a identidade en última instancia. Esta tamén será clave para esclarecer as causas da morte, que investiga a Garda Civil.
O corpo foi localizado en avanzado estado de descomposición por un grupo de sendeiristas, segundo a información do 112 Galicia. Atopárono nunha zona de difícil acceso e, sobre as 16:10 horas, deron o aviso ás autoridades.
Os servizos de emerxencias encargáronse de efectuar o rescate nun operativo que contou coa participación de efectivos do GES do Val Miñor e da Policía Local, ademais de manter en alerta os bombeiros do Porriño e de Vigo.
