O Sergas puxo en funcionamento nas últimas semanas a nova área de prevención e rehabilitación cardíaca do Hospital Álvaro Cunqueiro para ofrecer unha atención de referencia a 600 pacientes ao ano, o que supón aproximadamente a metade dos pacientes que ingresan en Vigo por episodios cardíacos. O conselleiro de Sanidade, Antonio Gómez Caamaño, xunto coa delegada territorial da Xunta en Vigo, Ana Ortiz, o director xeral de Asistencia Sanitaria do Sergas, Alfredo Silva, e o xerente da área sanitaria de Vigo, Javier Ponte, visitou este mércores a nova unidade acompañado pola doutora Marisol Bravo, responsable da unidade, e polo xefe do Servizo de Cardioloxía, Andrés Íñiguez.

O investimento da Xunta nesta nova unidade ascendeu a preto de 800.000 euros na obra e no equipamento, contando agora cunha superficie de 270 metros cadrados. Este novo espazo dispón de catro consultas, un ximnasio terapéutico, unha sala de emerxencias totalmente equipada, zonas de reunión e vestiarios. Deste xeito, ofrécense programas para reducir o risco de mortalidade e evitar novos episodios a pacientes que sufriron patoloxías cardíacas agudas, infartos ou intervencións coronarias. Tamén se actúa sobre determinados factores de risco mediante plans individualizados, como o programa de cesación tabáquica.

O conselleiro eloxiou o traballo do equipo que forma a unidade, con profesionais de cardoloxía, rehabilitación, enfermaría, fisioterapia, psicoloxía, nutrición, traballo social e farmacia. “Este equipo non só cura e acompaña no avance do benestar dos pacientes e na reincorporación segura á vida cotiá, senón que tamén forma e impulsa o coñecemento”, asegurou. A unidade combina a asistencia sanitaria coa formación de pre e posgrao e coa investigación clínica, en colaboración con outros servizos e coa Fundación Pública Galega de Investigación Biomédica Galicia Sur.

Os responsables autonómicos tamén avanzaron que nos próximos meses a Consellería de Sanidade licitará as obras de ampliación do servizo de Urxencias do Hospital Público Álvaro Cunqueiro. Ademais, xa está adxudicada a obra da área de Cirurxía Maxilofacial que se situará no Hospital Meixoeiro e actualmente está en fase de licitación a área de Reprodución Humana Asistida. Estas actuacións sumaranse ao novo hospital de día médico que a Xunta impulsou no Álvaro Cunqueiro, de forma coordinada coa nova sala de espera, humanizada, do Servizo de Oncoloxía.