A Policía Nacional identificou o cadáver achado na tarde deste pasado mércores nunha casa okupada de Vigo, tratándose dun home nado no ano 1993. Segundo fontes do devandito corpo de seguridade, non constaba denuncia de desaparición do novo, cuxo corpo foi localizado nunha casa en estado de ruína no barrio histórico da cidade olívica.

Ademais, as mesmas fontes indicaron que “aparentemente” non había signos de violencia, aínda que matizaron que será necesario esperar á autopsia para que o forense determine cal foi a causa da morte. A Policía Nacional continúa investigando o achado do cadáver deste home, atopado en estado de descomposición nunha casa en ruínas no barrio histórico de Vigo.

O aviso chegou aos servizos de Emerxencias pouco antes das 16.00 horas, e foron os veciños os que alertaron polo forte cheiro que saía dunha vivenda que adoita estar okupada e frecuentada por persoas sen fogar, no número 47 da rúa Poboadores, en pleno centro da cidade olívica. Ata o punto desprazáronse efectivos da Policía Nacional e do Imelga.