O conselleiro de Presidencia, Xustiza e Deportes, Diego Calvo, atopou “receptividade” nos representantes do sector empresarial e turístico da provincia de Pontevedra e da cidade de Vigo respecto da captación de novas rutas aéreas, para o que a Xunta achegará 100.000 euros en promoción turística por cada unha captada, cun máximo de dúas por aeroporto e ano.

“Todos os casos de negocio que se estudan desde Vigo entran dentro das súas inquietudes ou o que lles gustaría e entenden que serían bos para atraer viaxeiros”, asegurou o responsable autonómico ao remate da reunión co sector. Tamén insistiu en que “non vetará” ningún destino dentro do modelo liderado por Aena, que —en palabras de Calvo— é quen ten “máis información e a capacidade negociadora”.

Este encontro enmárcase na rolda de contactos que o Goberno galego está a levar a cabo e que finalizará esta semana cunha cita xunto ao sector da Coruña. En concreto, á deste mércores acudiron representantes da Cámara de Comercio de Vigo, a Asociación de Hostalaría de Vigo e a Federación de Hostalaría de Pontevedra. En días anteriores, Calvo reuniuse coa hostalaría de Santiago e representantes das deputacións, ás que pediu que realizasen as súas propias achegas ao modelo de Aena, un chamamento que estende ás administracións de todos os niveis.

A través destas reunións, a Xunta está a facilitar a estas entidades información de primeira man sobre a súa postura, en aras da colaboración institucional da captación de novas rutas e a alcanzar unha proposta “coordinada e conxunta” que, ata agora, “non existía”. Con todo, remarcou en que o Goberno galego non se “meterá” na “determinación” dos novos destinos que se incorporen aos aeroportos galegos: “Aena é o titular dos aeroportos, é quen ten as competencias e é quen ten toda a información. Sabe cal é a demanda que existe nos buscadores; sabe cantos pasaxeiros entran, por que aeroportos e cantos días botan en cada cidade, e sabe cales son os custos operativos”.

ACHEGA DA XUNTA

Pola súa banda, a Xunta de Galicia destinará 100.000 euros á promoción turística por cada nova ruta aérea que se capte en Peinador (Vigo), Alvedro (A Coruña) e Lavacolla (Santiago), cun máximo de dúas por aeroporto e ano. Isto suma un total de seis ao ano, un tope que non se pecha a ampliar “se hai algunha tempada na que se poidan conseguir máis voos”.

Desta maneira, o Goberno galego sumará o seu apoio ao modelo que propoña Aena para a captación de rutas, no que “confían“. Todo iso para alcanzar unha proposta “coordinada e conxunta” en materia aeroportuaria, á que piden “sumarse” a concellos e deputacións coas súas propias achegas.