O goberno de Vigo aprobará este venres a reforma integral do mercado de Teis, que suporá un investimento de máis de 1,86 millóns de euros, segundo anunciou o alcalde, Abel Caballero. O Concello acometerá esta “transformación” nun prazo de sete meses, despois de que a xunta de goberno local valide o proxecto básico e de execución na súa sesión deste venres.

A actuación prevé a renovación do pavimento principal, do sistema de recollida de auga e do saneamento. Así mesmo, o proxecto inclúe reparacións e pintados, a substitución de toda a iluminación e a demolición e construción de novas escaleiras, entre outros traballos estruturais. No que respecta ao exterior do edificio, os operarios repararán as paredes, as xanelas e as portas, e abrirán novos espazos para crear accesos directos desde a rúa á cafetaría do mercado.