O alcalde de Vigo, Abel Caballero, animou este xoves á cidadanía a vestirse de época e participar activamente na festa da Reconquista, que se celebrará na cidade olívica entre o 21 e o 29 de marzo. Nunha rolda de prensa, o rexedor explicou que a edición deste 2026 comezará o sábado 21 de marzo coa escenificación da destitución da corporación afrancesada e rematará o domingo 29 coa representación histórica da expulsión das tropas francesas da vila de Vigo.
Durante estes días, o programa incluirá actuacións musicais, talleres, xogos populares e diversas representacións históricas que recrearán os episodios da revolta popular contra a ocupación napoleónica. Un dos momentos destacados chegará a partir do venres 27 de marzo, cando abrirán os tradicionais postos de artesanía e alimentación, que nesta edición superarán os 200.
A RECONQUISTIÑA REUNIRÁ MÁIS DE 2.000 ESCOLARES
Entre as actividades previstas tamén destaca a Reconquistiña, que terá lugar o luns 23 de marzo e na que participarán case 50 colexios da cidade con máis de 2.000 nenos e nenas. Pola súa banda, a Asociación de Veciños do Casco Vello tamén fixo un chamamento aos vigueses para sumarse ás distintas actividades do programa vestidos con indumentaria da época, contribuíndo así a recrear o ambiente histórico dunha das festas máis emblemáticas da cidade.
