Un dispositivo conxunto formado pola Policía Nacional, a Policía Local e a Inspección de Traballo saldouse con diversas propostas de sanción en locais de lecer nocturno de Vigo. O operativo tiña como obxectivo reforzar a seguridade cidadá e previr o tráfico e consumo de estupefacientes nestas contornas. Durante as inspeccións, os axentes realizaron rexistros preventivos aos clientes e levantaron varias actas por posesión e consumo de drogas.
A Policía Local centrouse en supervisar as licenzas municipais, os seguros de responsabilidade civil e o cumprimento das medidas de seguridade, como o aforo, extintores e saídas de emerxencia. Nun dos establecementos, os axentes atoparon o chan cheo de cabichas, o que demostraba a permisividade co consumo de tabaco no interior. Por este motivo, tramitouse unha sanción ao responsable do local por permitir fumar e pola venda irregular de tabaco, ademais de multar a un cliente que foi sorprendido fumando.
Ademais das infraccións por consumo de substancias e tabaco, algúns usuarios foron propostos para sanción por falta de respecto aos axentes. O operativo tamén incluíu a verificación de aspectos de salubridade, hixiene e niveis acústicos para garantir que os establecementos cumpren coa normativa vixente e non supoñen un risco para os usuarios nin para a convivencia veciñal.
