O presidente da Xunta, Alfonso Rueda, destacou o “bo momento” no que se atopa o naval galego tras superar situacións “moi complicadas” vividas no pasado. Durante a súa intervención na clausura do Congreso Maritime Trends Summit, organizado por Asime esta semana en Vigo, o mandatario autonómico lembrou as crises derivadas do tax lease e a falta de pedidos que obrigaron a realizar reconversións. Rueda reivindicou que en Galicia as cousas fanse “moi ben” e apostilou que os barcos que se constrúen ou deseñan na comunidade son “Galicia Calidade“.

Malia o optimismo, o presidente galego sinalou necesidades urxentes como a falta de man de obra cualificada que afecta ao metal en xeral. Así mesmo, apuntou ás “enormes oportunidades” de futuro, especialmente no eido da defensa. Neste punto, destacou a estratexia da Xunta para consolidar a comunidade neste sector, co obxectivo de mobilizar uns 900 millóns de euros ata o ano 2030.

“BO MOMENTO”

No acto tamén participou o delegado do Goberno en Galicia, Pedro Blanco, quen garantiu que o Executivo central seguirá fortalecendo a industria naval cunha “visión de futuro”. Blanco definiu ao Goberno como o “mellor aliado” do sector polo seu investimento e acompañamento nos procesos de transformación industrial.

Pola súa banda, o alcalde de Vigo, Abel Caballero, subliñou a importancia histórica do naval para a cidade, lembrando que o seu desenvolvemento permitiu no seu día o asentamento da actual factoría de Stellantis. O presidente de Asime, Xusto Sierra, abriu a quenda de intervencións lembrando que o transporte marítimo é a “columna vertebral” do comercio mundial ao representar o 85% do total, tras unhas xornadas nas que se analizaron os principais retos e tendencias globais da industria.