Un home, M.B.G., de 35 anos de idade, resultou ferido grave tras golpear contra o solo nun parque de camas elásticas situado na localidade pontevedresa de Nigrán. Os feitos ocorreron na tarde do pasado martes, día 17 de febreiro, cando o home impactou contra o fondo ao mergullar nunha piscina de cubos de espuma. Tras o golpe, non foi capaz de saír polos seus propios medios ao asegurar que “non sentía as pernas”.
Segundo relataron testemuñas presenciais a Europa Press, o home comezou a gritar e a pedir axuda ao non poder incorporarse despois de chocar contra o fondo da piscina. O 112 Galicia recibiu a chamada dun particular pasadas as 19.30 horas alertando do ocorrido. A persoa que avisou explicou que o home se lanzara de cabeza e sufrira un golpe no pescozo, polo que solicitaba asistencia sanitaria inmediata e advertía da necesidade de movelo con extrema precaución debido á gravidade das lesións.
Até o lugar desprazouse unha ambulancia do 061 Galicia con base en Baiona, xa que a de Nigrán estaba ocupada noutro servizo, así como un profesional médico do Punto de Atención Continuada (PAC) de Nigrán. Ademais, mobilizouse unha UVI Móbil con base en Mos ao tratarse dunha posible afectación medular. Fontes do 061 confirmaron que o ferido foi trasladado inicialmente ao hospital Álvaro Cunqueiro de Vigo. Con todo, segundo fontes coñecedoras do caso, posteriormente sería derivado a un hospital da Coruña especializado para tratar a lesión.
