As eleccións para escoller ao próximo reitor ou reitora da Universidade de Vigo celebraranse entre os días 4 e 8 de maio, segundo avanzou o reitor, Manuel Reigosa, na reunión do Consello de Goberno da institución celebrada este xoves.

O Consello deu luz verde á convocatoria de eleccións de representantes do Claustro, que pon en marcha o proceso electoral. A proposta de calendario trasladarase agora á Comisión Electoral e contemplará, se fose necesario, a celebración dunha segunda volta, tamén en maio.

Tras a aprobación dese calendario, o proceso iniciarase coa publicación dos censos provisionais e posteriormente os definitivos, e continuará co prazo de presentación de candidaturas e a súa proclamación. Ata agora fixeron pública a súa intención de aspirar a ser reitores o catedrático de Enxeñaría Industrial, Jacobo Porteiro; a catedrática de Enxeñaría de Telecomunicación, Carmen García Mateo; e a catedrática e actual vicerreitora de Investigación, Belén Rubio.

Os candidatos presentarán os seus equipos e programas, establecerase un período de campaña electoral, unha xornada de reflexión e outra de votación. A partir de aí, proclamaranse os resultados e celebraríase, se procede, a segunda volta, cos seus respectivos prazos.

VEHÍCULOS AUTÓNOMOS NO CAMPUS DE VIGO

O campus universitario de Vigo será o primeiro de España en contar cun servizo de vehículo autónomo conectado, que poderá ser utilizado por toda a comunidade universitaria nos seus desprazamentos entre edificios.

Este xoves presentouse no campus o proxecto piloto de ciberseguridade para o vehículo conectaro sobre rede 5G, nun acto que contou coa presenza do reitor, Manuel Reigosa; do conselleiro de Facenda, Miguel Corgos; e do director do CTAG, Luís Moreno.

Este vehículo autónomo, desenvolvido integramente en Galicia yc on capacidade para 8 persoas, ademais de facilitar os desprazamentos, permitirá validar diferentes solucións avanzadas de transporte intelixente e ciberseguridade nunha contorna real, con tráfico, peóns e condicións variables.