Tres persoas resultaron feridas este martes ao saírse da estrada o vehículo no que viaxaban e chocar contra unha casa en Vigo. Dous deles viaxaban no vehículo e a terceira vítima estaba no interior da casa. O suceso, informou o 112, produciuse ao redor das 14.10 horas na Avenida Ricardo Mella, ao seu paso por Coruxo (Vigo).

A alerta foi recibida a través do Servizo de Urxencias Sanitarias de Galicia-061, que informaba dunha saída de vía dun turismo que acabou impactando contra unha vivenda. No vehículo viaxaban dúas persoas e, segundo indicaban, existía a posibilidade de que outra persoa resultase ferida o interior do inmoble.

No operativo participaron, ademais do 061, os bombeiros de Vigo, a Garda Civil de Tráfico e a Policía Local. Tal e como confirmaron os bombeiros, tiveron que intervir para axudar a saír aos dous ocupantes do vehículo, que resultaron feridos, así como para atender a unha persoa que se atopaba no interior da vivenda e que tamén estaba ferida.