O estaleiro vigués San Enrique (antigo Vulcano) completou a entrega dos últimos paneis estruturais do contrato con Dragados Offshore, culminando así unha fase clave do proxecto iniciado en 2025 para a fabricación de compoñentes destinados a unha subestación enerxética offshore (unha plataforma de enerxía no mar). Segundo informou Mariña Meridional, o pasado 11 de xaneiro o buque ‘Aristona‘ atracou no peirao sur do estaleiro para cargar eses últimos paneis, proceso que se completou nos días posteriores.
Este contrato supuxo a entrada de San Enrique no ámbito das estruturas para enerxías renovables, tras un exixente proceso de homologación no que o estaleiro certificouse en UNE-EN 1090 e ISO 3834 con Bureau Veritas. Estas acreditacións garanten a calidade das instalacións e os procedementos de soldadura para unha liña de negocio con crecente demanda internacional. Os paneis forman parte do proxecto BalWin1, desenvolvido por Dragados Offshore e a alemá Siemens, que consiste nunha das primeiras plataformas convertidoras HVDC de 2 gigavatios de potencia a nivel mundial para parques eólicos mariños.
CONTINUIDADE E REPARACIÓN NAVAL
Coa finalización desta primeira fase, San Enrique consolida o seu posicionamento como fabricante especializado de estruturas para o mar, unha actividade que complementa a súa tarefa tradicional de construción e reparación naval. En paralelo, o estaleiro traballa desde hai meses nun segundo contrato con Dragados Offshore, de maior alcance, cuxa entrega está prevista para os próximos oito meses. “Este proxecto marca un punto de inflexión para o estaleiro e reforza a nosa aposta polo sector das enerxías renovables”, explicaron os responsables do grupo Mariña Meridional.
Por outra banda, e á marxe desta liña estratéxica, o estaleiro vigués traballou nas últimas semanas no buque anclero ‘Boka Keeper‘ en tarefas de reparación e mantemento. O barco partiu o pasado domingo, tras esta escala técnica, con destino ás Palmas.
