A Concelleira de Benestar Social do goberno vigués, Isaura Abelairas, chamou este luns ‘ignorante’ á presidenta da Federación Veciñal “Eduardo Chao” (Favec), María Pérez, que acudira á praza do Rei en defensa de Aicha, muller marroquí vítima de violencia de xénero que estaba a punto de ser dasafiuzada, procedemento que foi posposto a última hora por un mes máis.
Abelairas acusou nesta rolda de prensa a María Pérez de poñer en perigo vítimas de violencia de xénero, ao mencionar a dirección dun suposto lugar de vivendas específico para elas, para que poidan vivir seguras de forma confidencial. Pérez considera que estas declaracións da concelleira son falaces, xa que o lugar é público desde a pasada primaveira, e esixe á concelleira de Benestar Social “desculpas públicas” e que se “retracte” se non quere ir a xuízo.
“Doulle ata o venres para que faga unha rectificación pública destas acusacións porque pola contra presentarei unha denuncia por inxurias e calumnias nos xulgados”, afirma a dirixente veciñal asegurando que está “cansada” de “insultos sen fundamento”.
Pérez considera “moi grave” que se lle acuse disto “cando nunca o dixen e, ademais, é algo público, basta con poñer o nome da zona na que están situados estes pisos na web do Concello e aparecen”. De feito, desvelou documentos do Concello nos que se fai mención a esta zona supostamente confidencial, As Roteas.
Desde a Favec, insiste Pérez, “pedimos á concelleira que se informe de quen di as cousas e cando se din” para non caer nestes “erros tan graves nin acusar a ninguén de nada que non fixo”. Precisamente, e segundo consta na acta pública da orde do día da xunta de goberno local do próximo xoves, dous destes pisos das Roteas serán entregados a dúas familias “entendemos que sen recursos”.
“Para información da Sr. Abelairas, nese documento tamén aparece a localización exacta destes aloxamentos que, por certo, agradecemos poñan a disposición das familias despois de moitos anos pechados e, casualmente, só uns días despois da nosa denuncia. Nunca é tarde señores”, conclúe a presidenta da Favec.
“Todas as mentiras que dixo as vai repetir no xulgado”, engadiu Pérez a Xornal de Vigo: “En maio de 2018 a Consellería de Igualdade cedeu esas casas a calquera familia en situación de exclusión e risco, porque xa se revelara a súa ubicación. Na propia web do Concello están publicadas”.
En canto á situación de Aicha, tras estar a punto de ser desafiuzada, Pérez subliña que está “en tensión. Estaba sen durmir, xa empaquetara as cousas”. A colaboración cidadá está a ser loable: “Chama moita xente para ofrecer regalos aos seus tres fillos”. Agora Aicha está enviando currículums para poder manterse os catro, xa que coas axudas non alcanza para cumplir os pagos e seguir adiante.
