A Xunta de Goberno Local de Vigo aprobou este venres de forma definitiva o proxecto de Zonas de Baixas Emisións (ZBE), e o seguinte paso será a elaboración e aprobación da ordenanza municipal que regule ditas zonas no aspecto xurídico, de control e xestión. Segundo informou o alcalde, Abel Caballero, en declaracións remitidas aos medios, a aprobación definitiva chegou despois de que se estimaran diversas alegacións.
Así, destacou unha proposta relativa aos horarios de carga e descarga, que deberán axustarse ao establecido na ordenanza municipal; e outra alegación estimada, que garante expresamente o acceso ás actividades dos prestadores de servizos nas zonas afectadas. O rexedor apuntou que, superado este trámite, o seguinte será a elaboración e aprobación da ordenanza reguladora, na que se establecerán tamén as excepcións necesarias para que asegurar “unha implantación proporcionada”, como o acceso a residentes, persoas con mobilidade reducida, aparcadoiros subterráneos e outras circunstancias particulares.
“Ten que haber unha continuidade lóxica; a entrada en vigor das ZBE non pode ser desproporcionada”, incidiu Abel Caballero, que tamén apuntou que debe haber continuidade “na actividade e na circulación dos vehículos que necesiten acceder ás zonas por motivos sanitarios, residenciais ou comerciais”. Finalmente, o alcalde remarcou que “ninguén terá que cambiar de vehículo para acceder” ás ZBE, xa que o Concello “non pode nin vai impor esa condición”.
