O delegado do Estado na Zona Franca de Vigo, David Regades, e o alcalde e presidente do pleno do organismo, Abel Caballero, visitaron este mércores o inicio das obras de reforma do complexo de edificios de López Moura, que albergará o futuro VgoTIC Global HUB.

Estes traballos darán lugar ao “centro tecnolóxico máis relevante de Galicia”, segundo sinalou a Zona Franca nun comunicado, no que confirmou que o Concello de Vigo confirmou esta mesma semana a licenza de obras. Deste xeito, este mércores comezaron os preparativos para o proceso de demolición do primeiro do catro edificios que conforman o complexo.

Trátase do Edificio 3, onde se instalará a Incubadora de Alta Tecnoloxía StartTIC, cun financiamento europeo de 3,5 millóns de euros, e que o Consorcio da Zona Franca xestionará co centro tecnolóxico Gradiant e a Cámara de Comercio como socios.

A previsión é que a demolición estea culminada a próxima primavera e, a continuación levará a cabo a demolición do resto de inmobles, onde estarán, entre outros servizos, o Centro de Negocios e Usos Múltiples, e o Centro de Excelencia Aeroespacial e de Defensa de INDRA.

Tanto Regades como Abel Caballero explicaron que o proceso continuará nos próximos meses, coa licitación das obras e a execución do proxecto construtivo, asinado pola arquitecta Carme Pinós (Premio Nacional de Arquitectura 2021).

“Este proxecto é unha das nosas grandes prioridades, que nos reafirma como polo tecnolóxico de máximo nivel e que, ademais, abrirá á cidade un espazo ata agora pechado á xente que será un punto de encontro froito desta transformación urbana”, subliñou David Regades.

Pola súa banda, o rexedor olívico puxo en valor “a total rexeneración de todos os edificios, as notables melloras arquitectónicas que se van a implementar, a nova praza pública que vai gañar a cidadanía e a localización de alta tecnoloxía en Vigo”.