O embaixador de Perú en España, Luís Iberico Núñez, encabezou este domingo unha ofrenda floral en Vigo como homenaxe ás vítimas do ‘Villa de Pitanxo’. Ao acto, que tivo lugar ás 13.00 horas desta xornada fronte ao edificio Virxe do Carme, situado no Porto de Vigo, acudiron oficiais da Armada española e peruana.
Alí, xunto á placa erixida en homenaxe ás 21 vítimas do pesqueiro galego naufragado en 2022 en augas de Terranova (Canadá), depositaron unha coroa floral na súa memoria e de todos os que dedicaron a súa vida ao mar. “Foi un acto con moito respecto, cunha mensaxe ás familias para darnos ánimos e continuar nesta loita de que se saiba a verdade e alcanzar unha sentenza xusta”, sinalou María José de Pazo, portavoz dos familiares das vítimas do pesqueiro galego, que mostrou o seu agradecemento a todos os participantes e organizadores do acto.
