A Xunta de Galicia remitiu ao Ministerio de Cultura a actualización do plan de necesidades da futura Biblioteca Pública do Estado de Vigo, adaptando ao momento actual o informe enviado xa en 2020. Segundo informou o Executivo autonómico nun comunicado, neste novo documento volveuse a facer fincapé nas dimensións do edificio, incidindo en que deberá contar con polo menos 8.000 metros cadrados.
Estas dimensións, lembra a Xunta, xa foron propostas e finalmente aceptadas polo Goberno, a pesar de que a primeira opción acordada co Concello contemplaba un edificio da metade do tamaño. “A Consellería de Cultura, Lingua e Xuventude volve dar un paso adiante con respecto a un proxecto estratéxico para a Comunidade, chamado a ser un dos seus grandes referentes culturais”, subliñou. Todo iso tras a visita do ministro de Cultura, Ernest Urtasun, a Vigo a semana pasada, cando anunciou a licitación da redacción do proxecto da devandita biblioteca en 2026.
Tras a súa construción, será a Xunta quen asuma a xestión da biblioteca, chamada a ser a maior de todo o territorio galego, superando a de Ourense, con 7.000 metros cadrados, e as da Coruña e Santiago, que dispoñen de 6.200 e 5.800 metros cadrados, respectivamente. O Executivo galego avoga por un inmoble con múltiples espazos polivalentes, atendendo á idea da diversidade de usos, máis aló das funcións propias dun equipamento deste tipo.
Así, o informe reflicte a idea de darlle maior versatilidade á biblioteca, para a dinamización cultural da cidade con programación de actividades para todos os públicos, facendo especial fincapé no apartado infantil. Tamén se solicita a eliminación de todo tipo de barreiras arquitectónicas tanto nas áreas de uso público como nas de persoal.
