A Policía Local de Vigo detivo o pasado sábado, día 12 de xullo, a un home, L.J.A.V. de Mos e 45 anos de idade, como suposto autor dun delito contra a saúde pública ao circular drogado e con máis de 20 gramos de estupefacientes. Foi sobre as 09.00 horas cando os axentes observaron como o home circulaba co seu patinete pola avenida do Aeroporto portando auriculares e levando un transportín cunha ave exótica.

Ao darlle o alto, os funcionarios decatáronse de que presentaba claros síntomas de atoparse baixo os efectos do consumo de drogas, polo que se lle realizou unha proba, dando positivo en alcol e en cocaína. Ademais, nun cacheo superficial, atopáronse máis de 4 gramos de cocaína, 18 de haxix e un de marihuana, sendo detido.