Unha muller de 56 anos e nacionalidade portuguesa foi evacuada este sábado en helicóptero das Illas Cíes, no Parque Nacional Marítimo-Terrestre das Illas Atlánticas de Galicia, tras sufrir un grave problema de saúde que requiriu atención médica inmediata.
Segundo fontes do parque, foi o persoal da Consellería de Medio Ambiente e Cambio Climático quen prestou a primeira asistencia á visitante, en colaboración co equipo de enfermaría do propio espazo natural. Tras a primeira atención, os profesionais sanitarios contactaron co servizo de emerxencias 112 Galicia, que activou o protocolo establecido para este tipo de situacións.
A evacuación realizouse desde o peirao de Rodas, punto designado para estes casos dentro do plan de emerxencias do Parque Nacional. Desde alí, a muller foi trasladada en helicóptero a un centro hospitalario para recibir asistencia especializada, cuxo nome e estado de saúde non transcenderon ata o momento.
COORDINACIÓN INTERINSTITUCIONAL
A dirección do parque fixo público un agradecemento a todos os equipos implicados na operación, destacando a eficacia da coordinación entre persoal ambiental, sanitario e servizos de emerxencia, que permitiu “unha resposta rápida e segura ante un caso de risco para a saúde”.
Ademais, lembraron á cidadanía a importancia de seguir sempre as indicacións do persoal técnico e de seguridade cando se producen situacións de emerxencia nas illas, especialmente nun espazo natural tan sensíbel e con acceso restrinxido como son as Cíes.
Este tipo de intervencións forman parte do dispositivo especial que se activa durante a tempada alta de visitas ao arquipélago, e que inclúe presenza permanente de equipos de vixilancia, información e asistencia sanitaria.
