Veciños da parroquia viguesa de Beade denunciaron a situación que viven tras estar desde o pasado domingo sen auga nas súas casas: “Con esta calor, non poder ducharse é simplemente noxento”.
Segundo relatan, varias vivendas da rúa Lombeiro, na zona da Pena, levan días sufrindo cortes de auga ao detectarse roturas en tubaxes que se van “parcheando”.
En declaracións a Europa Press, veciños afectados explicaron que xa o día 5 de xuño tiveron un corte de auga, así como o 13. Ademais, desde o pasado domingo, día 15, estiveron sen auga, a pesar da onda de calor. Precisamente este mércores a auga comezou a saír “escura e non fluída”.
“Non puxeron carteis. Ninguén di nada. É bastante frustrante”, lamentou unha veciña, que indica que os seus fillos menores están sen duchar con estas altas temperaturas, só podendo usar auga embotellada para asearse.
Ante esta situación, fontes do Concello confirmaron a Europa Press que se rexistraron varias roturas na zona, indicando que leste mesmo mércores quedará restablecido o servizo.
