Axentes da Policía Local de Redondela detiveron este domingo a un home como presunto autor de varios roubos cometidos na localidade nos días previos.

A intervención comezou ao mediodía, cando a Policía Local recibiu un aviso do 112 Galicia alertando de que un home saltara os valos e accedera ás vías do tren á altura do túnel na parroquia de San Esteban de Negros.

O home non foi localizado nun primeiro momento, pero si despois, e foi recoñecido polos axentes da Policía, que procederon á súa detención, xa que lle seguían a pista como presunto autor de varios roubos.

A súa irrupción nas vías obrigou a paralizar momentaneamente o tráfico ferroviario e provocou atrasos nas conexións, xa que a circulación non se restableceu ata que se puido garantir que esa persoa xa non estaba nas vías.