A Fiscalía pide máis de 15 anos de cárcere para dous homes acusados de agredir sexualmente a unha muller e gravar os feitos en Vigo. Concretamente, solicitan 15 anos por agresión sexual e tres máis para o que gravou o ocorrido. O caso, que se xulgará este mércores na Sección quinta, con sede en Vigo, da Audiencia Provincial de Pontevedra ás 10.00 horas, procede do Xulgado de Instrución nº7 de Vigo.
Segundo relata o Ministerio fiscal, a vítima, de 18 anos, denunciou os feitos a noite do 4 de setembro de 2022, día no que saíu cunhas amigas pola zona do Arenal de Vigo. Primeiro ao bar Aura, onde coñeceu aos acusados, e despois ao bar Rouge. Unha vez que este pechou, continuaron de festa no domicilio dun amigo dos acusados, aínda que este non foi con eles. A vítima e un dos acusados mantiveron relacións sexuais consentidas nunha das habitacións do citado domicilio. Tras unha discusión entre unha amiga e o outro acusado, esta e a súa outra amiga, xunto ao seu noivo, marcharon, quedando no domicilio os acusados e a victima.
Neste contexto, o outro acusado co que a vítima non mantivera relacións, entrou na habitación onde estaban a ter sexo a vítima e o outro home e, “aproveitando a presenza do coacusado e prevaléndose da situación ambiental así creada”, baixou os pantalóns e díxolle á vítima que lle fixese unha felación, ao que ela se negou dicíndolle que o acusado lle gustaba á súa amiga, contestando el que a súa amiga non se ía decatar do que fixeran os tres. Tras esta negativa, o acusado colleuna polo pelo e meteulle o seu pene na boca, para despois penetrala vaxinal ou analmente. A vítima pediulles que parasen, pero os dous acusados non o fixeron.
A continuación, un dos acusados púxose un preservativo e penetrona vaxinalmente gravando este feito co seu teléfono móbil sen o consentimento da vítima. No móbil atopouse un arquivo que contén o vídeo de contido sexual de 14 segundos de duración que gravou o propio acusado durante os feitos descritos. A proba de detección alcohólica practicada á vítima sobre mostras tomadas horas despois de acaecidos os feitos, arroxou un resultado dun gramo de alcol por litro de sangue e 1,47 gramos de alcol por litro de ouriños. Como consecuencia dos feitos descritos, a vítima sufriu dano psíquico a consecuencia dos feitos denunciados.
PENAS
Os acusados permaneceron en prisión provisional por esta causa desde o día 6 de setembro de 2022 ao 11 de novembro de 2022. Por auto de data 11 de novembro de 2022 acordáronse polo xulgado de instrución 7 de Vigo como medidas cautelares entre outras, a de prohibición de saír o territorio nacional e a de prohibición de achegarse á prexudicada a unha distancia inferior a 200 metros, así como de comunicarse con ela.
Por todo iso, a Fiscalía considera que os feitos son constitutivos de dous delitos contra a liberdade sexual (agresión sexual) e un delito de descubrimento e revelación de segredos — deste último só responde un dos acusados –. Solicitan, para o acusado que gravou, unha pena de tres anos de cárcere por este delito e de quince anos por agresión sexual; mesma pena que piden por este ilícito para o outro acusado. Os acusados, conxunta e solidariamente, deberán indemnizar á vítima na cantidade de 15.000 euros polas lesións psicolóxicas causadas e danos morais.
