A Fiscalía de Vigo solicita 14 anos de prisión para un home acusado dun delito continuado de agresión sexual con penetración sobre un menor de 16 anos, á que unía unha relación de superioridade e parentesco. O caso, que se xulgará na Sección quinta, con sede en Vigo, da Audiencia Provincial de Pontevedra este luns e martes, procede do Xulgado de Instrución nº3 de Vigo. Segundo relata o Ministerio Fiscal, os feitos tiveron lugar “en múltiples ocasións” entre 2002 e 2010. A agresión incluía a introdución de membros corporais e acceso carnal por vía bucal e anal.
Por iso, piden 14 anos de cárcere, a inhabilitación do acusado para calquera profesión que leve contacto regular e directo con menores de idade por un tempo superior en cinco anos ao da duración da pena de prisión que resulte imposta, a prohibición de aproximarse á vítima a menos de 500 metros e á súa nai, así como de comunicarse con el por calquera medio por tempo superior en 10 anos ao da duración da pena de prisión que resulte imposta; e medida de liberdade vixiada durante 10 anos. Como responsable civil, o acusado indemnizará á vítima con 5.000 euros polas secuelas que presenta e a cantidade que se determine en execución de sentenza que corresponda ao custo da terapia psicolóxica que comezou en novembro de 2020.
AGRESIÓN SEXUAL A MENOR NO PORRIÑO
A Fiscalía de Pontevedra pide seis anos de cárcere para un home acusado dun delito continuado de agresión sexual a unha menor de 16 anos. O caso, que se xulgará na Sección cuarta da Audiencia Provincial de Pontevedra este martes ás 10.00 horas, procede do Xulgado de Instrución nº2 do Porriño. Segundo relata o Ministerio Fiscal, os feitos tiveron lugar entre xaneiro e setembro de 2022, no domicilio dun familiar da vítima no partido xudicial do Porriño. Apuntan que a menor ten unha minusvalía declarada pola Xunta.
Por todo iso, piden que se lle impoña ao acusado a prohibición de aproximarse á vítima, a unha distancia non inferior a 500 metros, así como de comunicarse con ela por calquera medio durante sete anos e a súa inhabilitación para calquera profesión ou oficio que leve contacto regular e directo con menores de idade durante 10 anos. O acusado deberá indemnizar ademais á vítima con 6.000 euros por danos morais a través do seu representante legal.
