A sección quinta da Audiencia Provincial de Pontevedra, con sede en Vigo, acordou emitir requisitoria de procura, detención e ingreso en prisión con respecto a Borja F.F., acusado dun delito de agresión sexual a un home nun aparcadoiro da cidade olívica e que non se presentou este martes ao xuízo sinalado por estes feitos.
Así o acordou a sala, tras confirmar que nin sequera o seu letrado puido porse en contacto con el, e que fora correctamente citado. Deste xeito, ordenouse a súa procura e ingreso en prisión provisional, en tanto non se celebre o xuízo, para asegurar a súa presenza ante o tribunal e dado o elevado da pena que se solicita para el (un total de 11 anos de cárcere).
Dáse a circunstancia de que o acusado xa tivo que ser buscado anteriormente, posto que tampouco se presentou á declaración indagatoria ao final da instrución da causa. Tanto a Fiscalía como a acusación particular piden que sexa condenado a 11 anos de cárcere por uns feitos que ocorreron na madrugada do 29 de maio de 2022. Segundo o escrito de acusación pública, Borja F.F. abordou á vítima na rúa e, coa escusa de que lle convidaría a consumir cocaína, levouno ata os baños do aparcadoiro de Rosalía de Castro.
Unha vez alí, tentou obrigalo a que lle fixese unha felación, ao non logralo, empuxouno e, facendo uso da forza, baixoulle os pantalóns e agrediuno sexualmente. Logo tirouno ao chan e foise do lugar, levándose o teléfono móbil da vítima. Deste xeito, as acusacións atribúenlle os delitos de agresión sexual e de roubo con violencia.
