Referentes internacionais debaterán en Vigo sobre as tensións xeopolíticas e as súas repercusións nos dereitos humanos. Será os días 19, 20, 21 e 22 de marzo de 2025 dentro das xornadas “Mundo en crise: guerra xeopolítica e loitas sociais” en Vigo. Esta iniciativa de ECOAR))) pretende analizar a crecente inestabilidade global, os conflitos en curso e o papel dos movementos sociais e das organizacións internacionais fronte a estas ameazas.
Segundo apuntan os organizadores, a finalidade destas xornadas é proporcionar un entendemento máis profundo da dinámica do sistema-mundo e explorar as estratexias viables para enfrontarse aos desafíos actuais. Analizaranse o poder das potencias emerxentes, a crise da gobernanza internacional e o papel das empresas transnacionais na explotación de recursos e pobos. Ademais, exporanse formas de mobilización e resposta fronte ás crises globais.
As xornadas, que forman parte do proxecto Ágora-R, incluirán oito palestras, nas que se abordarán temas clave como o impacto das políticas neoliberais, os dereitos das persoas refuxiadas climáticas, o papel dos medios de comunicación na xeopolítica e as resistencias fronte ao poder corporativo e militarista.
Entre os relatores están osé Manuel Beiras; Fayez Badawi, activista palestino; Miguel Urbán, eurodeputado e activista; Aurora Moreno Alcojor, xornalista especializada en consumo e medio ambiente; Queralt Castillo Cerezuela, xornalista; Eduardo Giordano, xornalista arxentino; Manu Levin, analista político e comunicador ou Alberto Quian Pampín, xornalista experto en ética hacker.
