Stellantis Vigo decidiu suspender a paga de beneficios para os seus traballadores tras ser condenada polo Xulgado do Social número 2 da cidade olívica por “discriminar” a empregados en situación de incapacidade temporal ao reducirlles esta remuneración. Segundo informaron sindicatos, este luns a dirección da empresa comunicoulles a decisión de suspender de forma “indefinida” o pago de dita paga de beneficios, afectando non só á planta de Vigo, senón aos centros de traballo de toda España (Madrid e Zaragoza) e a toda a rede comercial.
Así, UGT manifestou o seu “total desacordo” con esta medida, a pesar de que xa alertara de que podería suceder; do mesmo xeito que Comisiones Obreras, quen cargou contra a CUT, o sindicato que denunciou que o acordo de paga de beneficios asinado por CC.OO., UGT e SIT coa empresa era “discriminatorio”. “Finalmente produciuse este anuncio, provocado por unha decisión inconsciente, sen darlle ao persoal a oportunidade de realizar unha valoración de se estaba de acordo en presentar a demanda, sendo esta decisión unicamente decidida por un grupo de persoas minoritario, que afectou á totalidade do persoal”, criticou CC.OO.
Por iso, tanto Comisiones Obreras como UGT dixeron que seguirán traballando para recuperar esta paga, solicitando unha reunión á dirección “o máis pronto posible” para negociar unha solución. Todo iso semanas despois de que o xuíz estimase a demanda interposta pola Central Unitaria de Traballadoras (CUT) e declarase contraria á lei as previsións de redución da parte teórica individual da paga variable de beneficios que establece o esquema de remuneracións de Stellantis para o período 2024-2027 por causar “discriminación directa e, subsidiariamente, indirecta por razón de saúde”.
Por isto, condenou tanto a Stellantis España como aos sindicatos CC.OO., UGT e SIT a cumprir as consecuencias económicas desta declaración, xa que esta medida foi asinada durante a negociación do novo convenio colectivo da empresa por estes sindicatos. Esta paga (non consolidada) calcúlase en función dos resultados do grupo do ano anterior e é negociada á vez que o convenio colectivo. Xa hai semanas UGT e CC.OO. denunciaran que a sentenza puña en xogo este pago, xa que a decisión xudicial deixaba sen efecto o pacto.
