O BNG de Vigo reclamou este mércores a retirada do proxecto Vigo Area do novo Plan Xeral de Ordenación Municipal (PXOM), xa que supón “arrasar” 25.000 metros cadrados de bosque, e sen posibilidade de alegación por parte dos veciños. Así o trasladou o portavoz nacionalista, Xabier Pérez Igrexas, tras manter unha reunión con membros da plataforma ‘Salvemos a Barroca’.

Segundo denunciou, o documento inicial da PXOM contemplaba ese espazo como zona verde, pero modificouse a cualificación do chan para convertelo en dotacional, sen posibilidade de que os veciños poidan presentar alegacións agora. “Un cambio sen ningún tipo de transparencia”, advertiu, á vez que constatou que o goberno local “coou este atentado ambiental pola porta de atrás”. Para o BNG “ningún mausoleo para macroconcertos como o Vigo Area pode xustificar un arboricidio a gran escala”, polo que pediu a súa retirada, así como a doutros proxectos que “queren condenar a Vigo a un modelo de cidade gris cemento”.