A Federación de Asociacións de Veciños ‘Eduardo Chao’ de Vigo, FAVEC, advertiu este luns de que o novo trazado da A-52 entre Vigo e O Porriño xera un rexeitamento “masivo” entre as parroquias, non só as afectadas, e lamentou que o alcalde da cidade, Abel Caballero, “ignora” aos veciños que sufrirán expropiacións e o dano ao patrimonio natural. Así o trasladou a presidenta da FAVEC, María Pérez, que criticou que o rexedor “non ten sensibilidade nin respecto” cara aos afectados polo trazado en túnel dese tramo da autovía, e insistiu en que “se realmente queren mellorar a seguridade na A-55 hai alternativas máis sustentables e que respectan o medioambiente”.
Nese sentido, avogou pola supresión da peaxe da AP-9 nese tramo, que discorre paralelo á autovía, e subliñou que “se hai tanta xente en contra, e se reúnen tantas alegacións, debería ser un sinal claro de que merece a pena considerar outras opcións”. “Non se pode seguir ignorando a voz dos cidadáns e presentar os seus intereses como algo accesorio ou mínimo (…), non se pode arrasar con todo”, advertiu María Pérez, que este luns presentou no rexistro do Concello olívico novas alegacións recollidas en parroquias.
Segundo sinalou, só a FAVEC presentou unhas 2.000 alegacións, pero a plataforma Bembrive en Pé xa reuniu unhas 8.000, ás que se suman as doutros afectados, como os veciños do municipio veciño de Mos. “Cando hai unha maioría que fala, hai que escoitar, que é o que falla aquí, igual que fallou co PXOM ou con outras cousas”, apuntou a presidenta da Federación. Desde a plataforma Bembrive en Pé, que ese luns continúan cos seus actos reivindicativos en contra dese trazado, no marco da celebración de San Blas, estiman que se superarán as 25.000 alegacións.
