O alcalde de Vigo, Abel Caballero, asegurou este venres que “antes de xuño de 2025”, data na que finaliza a última prórroga da concesión do bus urbano, estará “resolto” o concurso para unha nova concesión.
Así o manifestou, en resposta a preguntas dos medios, sobre o inminente fin desa concesión, dun dos contratos máis ‘zumentos’ na cidade, xa que é un servizo que se adxudica por un período de moitos anos (en marzo remitiuse unha comunicación ao Diario Oficial da UE co anuncio previo de licitación para un contrato de 10 anos) e supón un desembolso millonario para as arcas públicas.
O actual contrato entrou en vigor en 1995 e en 2020 o goberno local, que dous anos antes anunciara un novo concurso, acordou unha prórroga da concesión por cinco anos debido aos efectos da pandemia de Covid no servizo, e a vixencia de dita prórroga finaliza a principios de xuño deste ano.
Agora, segundo sinalou este venres o alcalde, a nova licitación “está en marcha”. “Están a facerse os informes, e (o concurso) farase en tempo e forma, e gañará o mellor”, aseverou, antes de remarcar que “antes de xuño de 2025 estará resolto”.
