Un condutor de 51 anos enfróntase a 3 anos de cárcere e á perda definitiva do permiso de conducir tras atropelar a un home en Vigo, cando circulaba baixo os efectos das drogas e co carné retirado por perda de puntos, causándolle lesións moi graves, que o deixaron en estado vexetativo. O xuízo por estes feitos celebrarase este xoves na sala do Penal 3 de Vigo.
Os feitos ocorreron na tarde do 8 de febreiro de 2022, na Avenida de Ramón Neto da cidade olívica. O condutor circulaba a case 80 quilómetros por hora nunha zona limitada a 40 km/h e, á altura dun paso de peóns, levou por diante a un peón que cruzaba a calzada nese momento e que non puido evitar o atropelo.
Como consecuencia do impacto, o corpo da vítima, un home de 41 anos nese momento, saíu disparado a uns 36 metros. O condutor deu positivo na proba de drogas para cocaína, anfetaminas, morfina, codeína e THC; ademais, a Policía Local, que interveu tras o accidente, comprobou que condutor non tiña en vigor o carné, por perda de puntos.
O home atropelado sufriu un traumatismo cranioencefálico severo e outras lesións moi graves, de maneira que tivo que ser sometido a varias intervencións. Ademais, tras o accidente diagnosticóuselle un status epiléptico e, ademais dunha traqueotomía, sufriu varias infeccións respiratorias multirresistentes, quedándolle graves secuelas que o deixaron nun estado vexetativo permanente.
GRAN INVALIDEZ
No momento do accidente, a vítima tiña recoñecida unha incapacidade absoluta e permanente, que se agravou a unha situación de gran invalidez, xa que é unha persoa absolutamente dependente, que non se pode comunicar, nin comer, nin camiñar.
Por estes feitos, a Fiscalía considera ao condutor responsable dun delito de condución baixo a influencia das drogas en concurso cun delito de lesións imprudentes, e dun delito contra a seguridade viaria por circular sen carné.
Así, reclama que se lle impoñan 3 anos de prisión e a perda permanente do permiso de conducir. Igualmente, como responsabilidade civil, establece que debe indemnizar conxuntamente coa súa compañía de seguros á vítima en algo máis de 3 millóns de euros, aos que se sumarán os gastos polo uso de elementos técnicos de asistencia que non cubra a Seguridade Social.
