O subdelegado do Goberno en Pontevedra, Abel Losada, confirmou a detención por ameazas, este mércores, do menor relacionado cunha agresión a outro mozo en Vigo o pasado mes de novembro.

Segundo confirmou, a Policía Nacional de Vigo detivo ao menor que hai uns días protagonizou unhas supostas ameazas nun centro educativo da cidade cara a outro mozo, ao que lle sacou unha navalla.

Trátase do mesmo menor que a finais do pasado mes de novembro agrediu a outro mozo na zona da praza da Estrela de Vigo causándolle lesións no lóbulo da orella en vinganza por unha rifa anterior entre eles.

O mozo, de 14 anos, pasou a disposición da Fiscalía de Menores, que está a valorar as medidas a tomar ante esta reiteración de comportamentos violentos.

Ante esta situación, o subdelegado incidiu en que, “aínda que é certo que adoitan acudir a zonas de lecer nocturno nas que se consome alcol e son protagonistas habituais de comportamentos incívicos e de incidentes de orde pública, tamén é verdade que non deixa de ser un grupo de rapaces con idades comprendidas entre os 14 e 15 anos”.

“Non quero en absoluto quitar importancia a estas actitudes, pois evidentemente un adolescente violento que sae á rúa e vai ao colexio con navalla e obxectos contundentes xera unha lexítima preocupación. Pero insisto en que non podemos esquecer que se trata dunha persoa que non alcanzou a madurez”, sinalou.

De feito, comentou que o mozo, cando foi informado das posibles consecuencias das súas accións, “derrubouse e non puido conter as bágoas”.

Abel Losada expresou toda a súa solidariedade cos mozos agredidos e ameazados, así como con todas as súas familias. Fixo fincapé tamén en que a policía “actuou e seguirá actuando” para esixir as responsabilidades que correspondan, “sempre dentro do marco legal aplicable a mozos de tan curta idade”.

“Unha vez expostos os eixos obxectivos, unha pelexa con lesións e unha ameaza entre adolescentes, tócame tamén facer unha chamada á sensatez nestes tempos de esaxeracións, ruído e fake news en prime time. Así que non podo máis que rexeitar as informacións de ton sensacionalista e os bulos en redes sociais, reproducidos de maneira absolutamente desafortunada”, defendeu.

Considera que se contribúe así a xerar unha “alarma innecesaria” e a presentar Vigo como unha cidade insegura “e que as bandas campan ás súas anchas, cousa moi lonxe da realidade, por non dicir surrealista”.