A Xunta de Galicia presentou este martes en Vigo unha ‘Guía de indicios para a detección de vítimas de violencia de xénero para a empresa’ no marco do seu campus formativo en igualdade laboral.

En concreto, o secretario xeral de Emprego e Relacións Laborais, Pablo Fernández, e o director xeral de Loita contra a Violencia de Xénero, Roberto Barba, presentaron este documento, que busca apoiar tanto ao tecido produtivo como aos traballadores na prevención e erradicación deste tipo de violencias.

Segundo explica a Xunta nun comunicado, esta guía dá resposta á Directiva comunitaria que recolle que as persoas con funcións de supervisión no lugar de traballo, tanto no sector público como no privado, deben recibir formación sobre os efectos da violencia contra as mulleres e a violencia doméstica no traballo e sobre o risco de violencia exercida por terceiros.

Neste sentido, este martes abordouse como actuar fronte á violencia de xénero no ámbito laboral, o papel das empresas e dos traballadores na loita contra a violencia de xénero e a actuación fronte á violencia de xénero no ámbito laboral.

“Será un instrumento de vital importancia para poder detectar de forma temperá e precoz a existencia de posibles malos tratos”, indicou Barba, explicando que é no ámbito laboral onde as mulleres pasan máis tempo e alí poden verse indicios de que as súas parellas as maltratan.

Por outra banda, Pablo Fernández tamén acudiu este martes ao VIII Congreso ‘Acción e Implicación’ organizado por Empresarias Galicia, co obxectivo de avanzar na competitividade e na igualdade no ámbito laboral.