A conselleira de Vivenda e Planificación de Infraestruturas, María Martínez Allegue, anunciou este xoves que a Xunta enviou ao Concello de Vigo o seu informe favorable respecto ao plan xeral de ordenación municipal (PXOM) da cidade olívica, que substituirá ao documento aprobado en 2008 e anulado polo Tribunal Supremo en 2015 debido a unha insuficiente motivación por parte do Goberno autonómico (naquel momento gobernada polo PSOE e o BNG) acerca da non obrigatoriedade da avaliación ambiental estratéxica.
Tras anos de confrontación entre ambas as administracións polo atraso neste novo plan, este xoves Martínez Allegue asegurou que o Executivo galego xa deu luz verde ao plan, quedando así só pendente o informe de Costas para que poida ser aprobado definitivamente no pleno municipal.
Segundo ela, trátase do último tramite que tiña que realizar a Xunta, que traballou “sen descanso” para emitilo “o máis pronto posible”. A titular de Vivenda subliñou a importancia deste plan para o desenvolvemento de Vigo, porque dará “seguridade xurídica”.
Antes de protagonizar unha tribuna do Círculo de Empresarios de Galicia, Martínez Allegue asegurou que dentro do informe autonómico incorpóranse certas suxestións, que non detallou, que terán que ser incorporadas no documento final que aprobará o pleno de Vigo.
Preguntada sobre se haberá algún tipo de fiscalización respecto diso, dixo que nos municipios de máis de 50.000 habitantes é competencia do propio concello. “Queda en mans do Concello”, sentenciou.
