O Consello da Xunta deste luns deu luz verde á contratación para construír 57 novas vivendas de promoción pública no barrio vigués de San Paio de Navia, ás que se destinarán 12,8 millóns de euros.
Tal como informou o Goberno galego, trátase dunha promoción de vivenda protexida destinada ao aluguer público, polo que se licitará a redacción do proxecto e dirección de obra, así como de execución de dous edificios de 38 e 19 vivendas, respectivamente. Estas edificacións contarán con novas técnicas de construción industrializada, que unen arquitectura con prefabricación para “optimizar prezo, sustentabilidade, seguridade, calidade e o mellor uso e mantemento dos inmobles”.
Con este grupo de vivendas, a Xunta xa ten en marcha un total de 316 pisos de promoción pública dos 359 que están previstos no polígono 1 da ampliación de Navia.
REHABILITACIÓN EDIFICIO RÚA LALÍN
Tamén en Vigo, o Consello da Xunta acordou a autorización da contratación das obras de rehabilitación do antigo edificio dos xulgados da rúa Lalín, cun importe de licitación duns 19,39 millóns de euros. Segundo dixo o presidente autonómico, Alfonso Rueda, prevese que as obras comecen “antes de que finalice o ano”, cun prazo de execución máximo de 16 meses.
O obxectivo é “darlle unha segunda vida ao servizo da cidade“, destinándoo a asociacións e entidades sociais, debido a “unha carencia detectada no Concello de Vigo posta de manifesto por moitas asociacións”.
