A secretaria xeral do PPdeG, Paula Prado, defendeu este xoves o modelo público-privado do Hospital Álvaro Cunqueiro de Vigo, a pesar das críticas que plasma nun informe o Consello de Contas.
A análise do órgano fiscalizador conclúe que sería máis eficiente licitar a obra e os servizos do centro por separado, e non conxuntamente como levou a cabo a Xunta, xa que suporía un aforro de máis de 470 millóns de euros (IVE incluído).
A preguntas dos medios, en rolda de prensa, Prado incidiu en que o propio informe “recoñece que era o único modelo viable posible”.
“Se non fóra polo modelo de contrato elixido teriamos que esperar 15 anos para a construción do Cunqueiro, co que suporía para Vigo e a súa comarca”, advertiu a dirixente popular, antes de concluír que é “o mellor hospital de Galicia e de España”.
