O Concello de Vigo volveu a reclamar ao do Porriño o pago de case 6 millóns de euros pola subministración de auga, despois das distintas “sentenzas favorables” do Tribunal Superior de Xustiza de Galicia (TSXG), segundo indicou o alcalde olívico, Abel Caballero, nun audio difundido aos medios de comunicación.
Foi en maio cando se coñeceu que o TSXG desestimou un recurso de apelación interposto polo Porriño, contra unha sentenza que rexeitou a súa pretensión de revisión do acordo plenario de Vigo polo que se establecía o cobro do canon que debían pagar o consistorio porriñés pola subministración de auga da presa de Eiras.
En decembro de 2023 o xulgado do contencioso administrativo 1 de Vigo ditou unha sentenza na que rexeitaba a pretensión do Concello do Porriño de que se revisase de oficio un acordo plenario de Vigo, do ano 1998, polo que se establecía o pago das cantidades que o consistorio porriñés debía abonar ao olívico, en concepto de “gastos de recuperación do investimento, vixilancia e mantemento da canle e encoro de subministración de auga”.
Agora, Caballero asegurou que os anteriores gobernos do Porriño si pagaban e o actual “deixou de pagar”. “En consecuencia vémonos na obrigación, salvagardando o dereitos dos vigueses, de levar adiante este sistema de prema para o cobro”, subliñou. Na sentenza, a débeda era de algo máis de 5,6 milones de euros pero, agora, contando o 2023, o rexedor vigués calcula que supera xa os 5,8 millóns.
Abel Caballero lamentou ter que recorrer a este tipo de vías para solucionar o problema, indicando que “había outras formas”, pero o goberno local do Porriño “non deixou outra alternativa”.
ALCALDE DO PORRIÑO
Pola súa banda, o alcalde do Porriño, Alejandro Lorenzo, desmentiu a existencia dun acordo anterior e tamén que o anterior goberno local pagase facturas respecto diso. “Eu pedín dúas veces poder reunirme co concelleiro de Facenda e sigo esperando contestación”, subliñou en declaracións a Europa Press.
El explicou que o que Vigo reclama é a construción dunha canle nos anos 90 do século pasado desde a presa de Eiras para fornecer auga a varias localidades, incluíndo O Porriño. Lorenzo dixo que hai anos (cando tamén gobernaba o PP no Porriño con Nelson Santos) pagáronse facturas con fondos estatais, a pesar de que foron informadas desfavorables por intervención do Concello do Porriño, ao estar en desacordo. Agora, o caso está recorrido nun contencioso administrativo, porque a cantidade reclamada foi establecida de forma “unilateral” por Vigo.
O rexedor explicou que, en 1991, Vigo notificou ao Porriño a súa pretensión de que este segundo pagase pola canalización e o mantemento das instalacións de subministración de auga. Acordo que non foi impugnado polo Concello porriñés naquela época, a pesar de que si podería facelo, “polo que quedou firme e consentido”. Agora, o goberno local si pretende que este acordo “unilateral” non teña efecto, insistindo en que non é pola auga, senón polas obras para canalizala.
