O Ministerio de Transportes e Mobilidade Sustentable ten previsto destinar, a través de dous contratos, 48,8 millóns de euros (IVE incluído) a modernizar o tramo de 13 quilómetros entre Vigo-Guixar e Redondela da liña de ferrocarril convencional Ourense-Vigo, a denominada Liña do Miño. O obxectivo, destacou o Ministerio nunha nota de prensa, é reforzar o tráfico de viaxeiros e mercadorías deste eixo estratéxico no Corredor Atlántico.
Adif licitou un dos contratos por 36,5 millóns de euros para a renovación de vía deste trazado, con actuacións nas estacións de Redondela e Vigo Guixar, o apeadeiro de Chapela e o túnel de Vigo, xunto a outras estruturas. O segundo contrato adxudicouse á UTE integrada por Enyse e Teléfonos, Liñas e Centrais por 12,3 millóns de euros para adecuar a sinalización do tramo á próxima modernización da súa electrificación e a súa integración no sistema de xestión de tráfico en remoto e tempo real. En concreto, na estación de Redondela, construirase unha nova plataforma central, ampliarase a súa lonxitude e aumentará a altura do resto, conectando todos cun novo paso inferior. Isto completa as actuacións que se atopan en proceso de contratación para reforzar a accesibilidade da estación, un investimento de 3,6 millóns (IVE incluído).
Por outra banda, na estación de Vigo-Guixar despregaranse novos desvíos (aparellos para que os trens pasen dunha vía a outra) de maiores prestacións e prolongarase a plataforma na cabeceira das vías para facer posible a chegada e saída de trens de máis de 600 metros. Así mesmo, no barrio de Chapela habilitarase un novo apeadeiro, cunha plataforma de 220 metros, nunha localización próxima a un aparcadoiro e a unha pasarela peonil sobre as vías. Así, está previsto que se melloren as condicións de mobilidade dos cidadáns e a integración do ferrocarril na contorna.
As actuacións complétanse no túnel de Vigo, desde o reforzo da súa impermeabilización, o revestimento e drenaxe, á adaptación da súa gálibo á futura nova electrificación; así como melloras en terrapléns, desmontes, drenaxes e outras infraestruturas.
