A Xunta estableceu a veda para a captura do choco nas rías de Vigo, Pontevedra e Arousa e prohibiu a súa captura, tenencia a bordo, transbordo, comercialización e venda ata finais de outubro. Segundo recolle este martes o Diario Oficial de Galicia (DOG) en senllas resolucións, a veda desta especie en Vigo e Pontevedra comprenderá desde o 22 de xullo ata o 31 de outubro, ambos inclusive. Mentres, na ría de Arousa estableceuse desde o 29 de xullo e permanecerá vixente ata o 31 de outubro.

Tamén detalla que esta norma inclúe a pesca marítima de recreo, de acordo coa normativa vixente. Ademais, as capturas accidentais deberán ser devoltas ao mar. Estas medidas adoptáronse tras uns informes técnicos que constatan que a partir do mes de xuño a porcentaxe de individuos xuvenís capturados increméntase un 80% en Vigo, un 67% en Pontevedra e un 48% en Arousa respecto de meses anteriores, nos que se recomenda limitar o emprego das diferentes artes de pesca nas zonas máis interiores das rías.