A Policía Local de Vigo identificou a dúas persoas que foron sorprendidas extraendo ameixa de forma ilegal nunha praia do barrio de Teis, e a quen se lles interviñeron cinco quilos deste molusco.

Segundo informaron fontes policiais, os feitos ocorreron na mañá do pasado 4 de xuño, cando unha patrulla de motoristas do 092 observou a dúas persoas mariscando nunha praia próxima ao Camiño do Laranxo.

Ao pedirlles a autorización, estas persoas non achegaron permiso algún, polo que foron identificadas para a correspondente denuncia ante a Consellería do Mar.

Así mesmo, os axentes comisaron os aparellos de pesca que estaban a usar e un total de 5 quilos de ameixas, que foron devoltas ao seu hábitat, en coordinación co garda rural da Confraría de Pescadores de Vigo.