Unha nova polémica enfronta ao Concello de Vigo e á oposición. Desta volta, o rescate do Auditorio Mar de Vigo. O concello apunta que non lle custará nada aos vigueses grazas á súa boa xestión, mentres que os grupos da oposición en Vigo acusan a Abel Caballero de mentir porque a operación terá un custo de 35,2 millóns de euros por unhas instalacións “que xa son municipais”.
O portavoz do goberno local, Carlos López Font, dixo que o rescate xerará ingresos que compensarán o desembolso deses 35,2 millóns e, ademais, o Concello aforrarase o pago dos 600.000 euros anuais que custaba alugar as aulas para a UNED. “Toda a operación é magnífica porque o Concello contará, non só cun Auditorio que explotará directamente, senón cun hotel, un aparcadoiro e 4.000 metros cadrados de locais comerciais que pode vender”, dixo.
Ademais, cargou contra o PP porque, dixo, “pretendía que se pagasen 77 millóns de euros”. “Son uns mentireiros, están frenéticos porque o decidido en Xunta de Goberno trastornou os seus plans, porque a operación saíu ben”, afirmou.
“QUERE VENDER ISO COMO BOA NOTICIA”
Pola súa banda, a portavoz do PP, Elena Muñoz, dixo que a eses 35,2 millóns hai que sumarlle outros 40 millóns de diñeiro público investidos no complexo (30,5 millóns de achega de Xunta e Concello para a construción, os 5 millóns inxectados cando se ampliou a concesión e unha quita doutros 5 millóns).
“O problema naceu en 2007, cando o alcalde decidiu modificar o contrato e reducir as dimensións do complexo. Foi precisamente esa decisión, xunto coa falta de desenvolvemento urbanístico da zona, o que motivou a quebra da sociedade que explotaba o auditorio”, dstacou en rolda de prensa.
“É o colmo que o alcalde queira vender isto como unha boa noticia e queira poñerse unha medalla. Por que? Por ter que pagar 35,2 millóns?”, destacou Muñoz, quen avanzou que o seu grupo pedirá a comparecencia de Abel Caballero no pleno para “dar explicacións” sobre a xestión desta crise.
FISCALÍA
Finalmente, o grupo municipal Marea de Vigo denunciou que a liquidación do Auditorio “se vai a cargar no peto de todos os veciños” e que, para facer fronte ao pago, haberá que recorrer a remanente de tesouraría e ao alleamento de patrimonio público.
O seu portavoz, Rubén Pérez, cuestionou a “rendibilidade” dun complexo para o que será “moi difícil atopar comprador” e volveu a reclamar unha comisión de investigación sobre o percorrido desta concesión e as condicións do contrato. Por iso, instou á Fiscalía a investigar “de oficio” o ocorrido no Auditorio Mar de Vigo e acusou a Caballero de “mentir” sobre a liquidación da infraestrutura.
Pola súa banda, desde Compromiso por Galicia acusan ao alcalde de Vigo, Abel Caballero, de ser o máximo responsable do fallo da concesión municipal sobre o Auditorio Mar de Vigo. Xoán Antonio Cortés, secretario local en vigo da forza política galeguista, traslada a sua preocupación polos custes que poderia supor finalmente isto para as finanzas municipais. Unha situación da que, destaca, deben responsabilizarse desde o goberno local, xa que no 2012 ampliaron a concesión á actual empresa aos 60 anos, sabendo da situación de mala xestión e crise económica que atravesaba a mesma”.
