O atuneiro ‘Ría de Aldán’, comprado o ano pasado pola viguesa Wofco, viuse implicado nun accidente marítimo a 240 millas de Illa San Cristóbal, en Galápagos (Ecuador), con outro buque de bandeira venezolana.
Segundo relatan medios ecuatorianos, o ‘Ría de Aldán’ chocou na noite do mércores ao xoves contra o ‘Canaima’ e este último afundiuse. Neste sinistro, resultou desaparecido un biólogo de 53 anos de nacionalidade venezolana que ía a bordo do ‘Canaima’, mentres que o resto da tripulación foi posta a salvo.
Ao coñecer o ocorrido, a Armada de Ecuador enviou unha lancha para rescatar e dar apoio ante esta emerxencia no Pacífico e comunicou a todas as unidades próximas para que se sumasen á procura.
A ‘Ría de Aldán’ é un atuneiro de 90 metros de eslora que comprou en 2023 Wofco, unha pesqueira con sede en Vigo, e opera en augas do Océano Pacífico. No seu caso, só sufriu danos na proa.
