A portavoz popular, Elena Muñoz, vén de anunciar este venres que o grupo municipal popular pedirá o apoio da Corporación Municipal ao centro de innovación tecnolóxica e emprendemento en Formación Profesional, mediante unha moción que presentarán no próximo pleno. “É un proxecto de cidade, de futuro, importantísimo para Vigo, e por iso queremos que se apoie”, destacou.
A popular sinalou que é crucial para Vigo “non deixar escapar esta oportunidade, tanto para as empresas como para os mozos vigueses e galegos”, que coa apertura deste campus terían “unha oportunidade extraordinaria de ter a máxima cualificación para poder traballar no noso sector empresarial”.
“Por este motivo, e ante a importancia do proxecto, imos seguir esixindo que se manteña a súa creación”, resaltou a popular, quen criticou as escusas argumentadas polo delegado por “incoherentes” e preguntoulle “por que 5 millóns para un despacho para el no centro ou un carril bici que anunciou si lle parece ben, e un proxecto dirixido a reter talento e formar a traballadores, non”.
Elena Muñoz lamentou que se poña en risco un “centro pioneiro e de excelencia” polo “desmarque” da ZFV á hora de materializalo. “Este campus poñería a Vigo no mapa e faría que fose unha cidade pioneira en España”, incidiu, destacando que o proxecto axudaría a integrar a todos os centros de formación profesional.
Neste marco, a líder dos populares sinalou que, en caso de non materializarse a iniciativa, supoñería “unha perdida extraordinaria para Vigo”, motivo polo que volveu a insistir a ZFV para que rectifique a súa posición e volva poñer o proxecto “encima da mesa”. Algo que, como expón, permitiría “reter o talento e formar profesionais capacitados para atender as necesidades do noso tecido empresarial”.
Elena Muñoz destacou que o “principal responsable” de que este proxecto se perda é o alcalde de Vigo e a súa “confrontación política estéril” contra a Xunta de Galicia co único obxectivo de obter rendibilidade política.
“É unha decisión política ordenada polo alcalde, que xa está en campaña cre que isto lle pode achegar votos, pero a realidade é que así a única que sae perdendo é a cidade de Vigo”, lamentou, apuntando que Vigo segue perdendo peso empresarial “ano tras ano” e que mostra un claro declive, “non porque o diga o PP, senón porque os datos corrobóranos”.
A popular sinalou que Caballero está “obsesionado coas eleccións” e que para cada solución que buscan outras administracións, “el busca un problema”. “O que pensa é que canto peor nos vaia aos vigueses, a el vaille mellor”, criticou, mostrando o seu rexeitamento absoluto á forma de facer política do rexedor local, na que busca “enfrontarse a todos, e a todo, soamente coa intención de conseguir titulares”.
