A Xunta prohibiu desde este venres e ata novo aviso as queimas agrícolas e forestais realizadas por particulares.

Desta forma, quedan excluídas desa prohibición as queimas controladas que realiza o servizo de prevención e defensa contra os incendios forestais debidamente planificadas e dispoñendo dos medios de extinción necesarios.

Así o informou o Executivo galego que detallou que “non dará” máis permisos e os xa concedidos “quedarán en suspenso” a partir deste venres.

A decisión tomárona tras valorar a evolución da situación meteorolóxica e unha vez analizados os diferentes indicadores técnicos que inciden no risco de lume.

Neste sentido, tamén argumentou que a normativa -Decreto 105/2006, polo que se regulan medidas relativas á prevención de incendios forestais, á protección dos asentamentos no medio rural e á regulación de aproveitamentos e repoboación forestal- prohibe as queimas en cando as condicións meteorolóxicas poidan dificultar o seu control.

A Consellería do Medio Rural pide colaboración da cidadanía para que extreme as precaucións e denuncie calquera actividade delituosa incendiaria da que teña coñecemento.

Ademais, o departamento que dirixe José González lembrou que está ao dispor dos cidadáns o número de teléfono gratuíto 085, ao que deben chamar en caso de detectar algún incendio forestal.