O alcalde de Vigo, Abel Caballero, e a concelleira de Urbanismo, María José Caride, mantiveron este luns un encontro con representantes empresariais e de colexios profesionais para abordar a situación da tramitación do novo Plan Xeral de Ordenación Municipal (PXOM), ao termo da cal, o rexedor volveu a insistir en que “non existe ningunha razón para que a Xunta tente paralizar o Plan”.
Nunhas declaracións remitidas aos medios, Caballero sinalou que o goberno municipal trasladou nese encontro que o PXOM conta co máximo nivel de protección patrimonial, en contra do que sostén a Xunta, e que hai unha “necesidade imperiosa” de que o novo plan sexa aprobado por parte do goberno galego para que Vigo dispoña de vivenda a prezo alcanzable, espazos deportivos, dotacionais, zonas verdes, etc.
Segundo incidiu o alcalde, non aprobar o Plan supón “frear unha parte da marcha da cidade” e, tras insistir en que o goberno local está disposto ao “diálogo”, reiterou que a posición da Xunta é “estritamente política”, porque paralizou o Plan “sen lerse os documentos”. “Iso é política, dicilo tres días despois das eleccións, e non tres días antes”, aseverou.
Segundo Abel Caballero, todos os participantes na reunión manifestaron o seu “apoio total” ao Concello e o seu convencemento de que o PXOM “ten que saír adiante”, con “datas inmediatas” para que a cidade poida facer a súa propia planificación. Finalmente, o rexedor recalcou que o Plan “é moi bo” e “cumpre coa legalidade”, á vez que retou: “O que diga que non, teno que demostrar”.
EMENDAR ERROS PARA QUE “NON O VOLVAN A TOMBAR”
En resposta ás manifestacións do alcalde, a delegada territorial do goberno galego, Ana Ortiz, lamentou que Abel Caballero “segue empeñado en culpar á Xunta da súa incapacidade para cumprir cos requisitos legais que precisa o Plan”. En declaracións remitidas aos medios, Ortiz lembrou que o Concello “ten que cumprir coa lei” para que a Xunta poida emitir informes favorables e lembrou que o anterior plan foi anulado en 2015 polo Tribunal Supremo “porque a actual concelleira de Urbanismo e entón conselleira (María José Caride) non fixo o que tiña que facer”.
Ortiz subliñou que é necesario que o goberno local “emende erros” do documento e complete o expediente cos informes preceptivos que faltan, o de aviación civil e o de telecomunicacións. “Cando teñamos todo, os nosos técnicos responderán canto antes”, engadiu. Finalmente, lembrou que a propia María José Caride sinalou hai unha semana que os erros do Plan serían resoltos “en 5 minutos”, pero unha semana despois a Xunta segue “esperando”. “Polo ben de todos os vigueses, necesitamos un Plan legalizable e axustado á lei para que non o volvan a tombar os tribunais”, concluíu.
